TEMA 6: DIARIO

Benvid@s de novo a este blog! Como comentei no dossier, neste tema traballamos coas programacións didácticas e algúns documentos sobre as oposicións. O dossier está centrado nas actividades realizadas, que tratan principalmente das programacións, polo que neste diario gustaríame afondar no aspecto das oposicións.

Extraído de rtve.es

Xa sexa a curto ou longo prazo, todo o alumnado deste mestrado pensou en presentarse ás oposicións de secundaria nalgún momento. Por tanto, este proceso de selección interésanos (á par que nos asusta) a todos nós.

Os procesos selectivos divídense en dúas fases: a fase de oposición (60%) e a fase de concurso (40%), que no noso caso deberán realizarse integramente na lingua da nosa especialidade.

A FASE DE OPOSICIÓN

Primeira proba: proba na que se deben demostrar os coñecementos específicos da nosa especialidade docente. Consta de dúas partes que se valorarán xuntas:

- Parte A: proba práctica que consta de exercicios axustados á especialidade correspondente e que permite comprobar a formación científica e as habilidades técnicas do candidato ou candidata.

- Parte B: proba teórica consistente no desenvolvemento dun tema. Proporciónanse 5 temas que forman parte do temario oficial da especialidade (aquí inclúo o de inglés), dos cales o candidato ou candidata deberá elixir un e desenvolvelo por escrito.

Ambas partes calificaranse de 0 a 10 puntos e ponderarase a parte A multiplicando a calificación por 0,6 e a parte B por 0,4. Para superar esta proba é necesario ter un mínimo de 2,5 puntos en cada unha das partes e unha puntuación total igual ou superior a 5 puntos.

Extraído de cen.edu

Segunda proba: esta proba realizarana soamente as persoas que superen a primeira proba; nela deberán demostrar a súa aptitude pedagóxica e o seu dominio das técnicas necesarias para a docencia. Ao igual que no caso anterior, a proba consta de dúas partes.

- Parte A: consiste na presentación e defensa dunha programación didáctica dun curso escolar dun nivel de secundaria ou ensinanza de idiomas elixida pola persoa candidata. A programación deberá conter 15 unidades didácticas.

- Parte B: consiste na preparación e exposición oral dunha unidade didáctica ante o tribunal. Esta unidade didáctica pode estar relacionada coa programación presentada ou cun tema do temario oficial da convocatoria. A persona candidata poderá elixir un tema de entre tres extraídos ao chou por ela mesma.

Esta proba calificarase de 0 a 10 conxuntamente e, ao igual que na proba anterior, o candidato ou candidata deberá ter unha puntuación igual ou superior a 5. A parte A conta un 60% e a parte B un 40%.

Extraído de cen.edu

A FASE DE CONCURSO

Cando superamos a fase de oposición, pasamos á de concurso. Esta fase baséase no baremo de méritos das persoas candidatas, é dicir, adquirimos puntos grazas á nosa formación académica e experiencia docente, podendo alcanzar un máximo de 10 puntos. A fase de concurso divídese en tres bloques

• Experiencia docente previa: máximo 7 puntos.
• Formación académica: máximo 5 puntos.
• Outros méritos: máximo 2 puntos.

Se clicades nesta ligazón, poderedes ver de maneira máis detallada cales son os méritos e a súa valoración no Anexo II.

Extraído de Opositer

Espero que esta entrada vos servise de axuda para clarificar todas as dúbidas que adoitamos ter sobre a estrutura das oposicións ás que nos enfrontaremos nun futuro. Sei que pode parecer complexo e desalentador, pero debemos confiar nas nosas capacidades e saber que con esforzo, podemos sacalas. Ánimo e sorte, futur@s opositor@s!