TEMA 6: DOSSIER

Benvid@s de novo a este blog! Na entrada de hoxe falaremos sobre as actividades levadas a cabo nas sesións do Tema 6. Os contidos deste tema estaban relacionados coas programacións didácticas, polo que o profesor nos explicou os aspectos máis importantes que deben ter estes documentos. Así mesmo, as explicacións estiveron moi orientadas ás oposicións, pois puidemos ver e analizar todas as partes da rúbrica que se utiliza para avaliar programacións e unidades didácticas nos procesos selectivos de docentes de secundaria e de EOI.

Despois desta parte máis teórica, comezamos coa primeira actividade do tema. Dividíronnos en pequenos grupos de catro ou cinco persoas e tivemos que escoller unha programación didáctica real para analizar. No meu grupo pensamos que sería interesante falar da programación dalgún lugar coñecido, polo que decidimos que analizaríamos a programación didáctica dun dos institutos nos que estudamos. Nun principio botámoslle unha ollada a todos, pero decantámonos pola programación do instituto dunha compañeira, o IES de Mos, porque pensabamos que non estaba demasiado completo e que tería máis aspectos que comentar.

Para a análise, empregamos a rúbrica utilizada na avaliación das oposicións, que contiña oito puntos: contextualización, coherencia, cualificación, metodoloxías, atención á diversidade, plan lector e transversalidade, avaliación da programación e calidade da defensa. Cabe destacar que o último punto non o puidemos avaliar ao tratarse dunha programación escrita dun centro. A modo de resumo, a programación non era demasiado boa, pois a maioría dos puntos tratábanse de maneira moi xeral e sen proporcionar situacións reais, que son as que realmente importan e as que fan que unha programación sexa boa e adaptada ao seu alumnado. Así mesmo, os elementos non estaban moi cohesionados. Aínda así, destacamos a orixinalidade e claridade no formato e a súa adecuación á realidade da materia. Na segunda sesión, todos os grupos presentamos as nosas análises, feito moi enriquecedor, xa que cada programación era distinta ás demais e todas tiñan aspectos bos e malos que nos axudan a asimilar como debería ser unha boa programación didáctica. A continuación inclúo a nosa análise completa e a presentación que elaboramos en Genially, por se lle queredes botar unha ollada!

Ao rematar as exposicións orais, o docente propúxonos unha segunda actividade. Esta consistía en realizar entre todos unha proposta de programación didáctica en formato «oposición» nun documento de Drive compartido. Dividímonos en grupos e cada un encargouse duns apartados concretos. No meu grupo fixemos os puntos correspondentes a estándares de aprendizaxe, contidos mínimos, avaliación (criterios, procedementos e instrumentos) e atención á diversidade. Para min, esta tarefa contén información moi útil para o noso futuro. pero foi unha pena que non contásemos con máis tempo para poñer en común toda a información de forma oral. De todas formas, temos o documento á nosa disposición para lelo e ter unha referencia, que non é pouco!

En definitiva, as actividades destas sesións parecéronme moi interesantes e, sobre todo, útiles, xa que estaban enfocadas ás oposicións, o futuro que en principio nos espera a todas as persoas deste mestrado se queremos impartir clases nunha institución educativa pública.